روايه قوه روح لكاتبتها فاطمه عيد

انى مقولتلكش بس احنا علاقتنا مكنتش كويسه عشان احكيلك .. انا مريت بظروف صعبه كتير اوى من غيرك .. كنت محتاجالك فى كل لحظه .. كنت بلاقى الدعم من كل اللى حواليا لكن مكنتش بحس بفرحتى كامله .. كنت بتمنى تكون جنبى وتاخد بايدى واقف على رجلى معاك مش لوحدى .. لكن للاسف علاقتنا كانت مقطوعه وقضينا وقت طويل منعرفش عن بعض حاجه .. فارجوك متلومنيش 
ادهم سمعها وساكت تماما حاسس باحاسيس مختلفه جواه .. فخر .. فرحه .. ضيق .. حزن انه ميعرفش .. مش عارف المفروض يتصرف ازاى بعد اللى عرفه دا .. بدأ يبص للاوضه اللى ديكورها اتغير وطريقه لبسها واكسسوارتها اللى بتدل انها مش عاديه .. لهجتها فى الكلام .. طريقه تفكيرها .. باصصلها وساكت ومش عارف المفروض يعمل ايه ..

نيران انا معملتش حاجه غلط .. انت كنت عارف بموضوع الكورس وشغلى وقولتلى هسيبك تجربى وتلعبى ومليش دعوه .. وانا كنت بجاهد وبعافر عشان اوصل .. اه انا مخترتش الماضى ومخترتش جهلى .. بس على الاقل الحاضر والمستقبل هما اللى فى ايدى .. متلومنيش انى نجحت وكبرت وبقى ليا اسم وبقيت اليق بيك .. اليق بتعبى انا ومجهودى مش عشان بنت عمك ومن عيله الشافعى .. ومتفتكرش انى اختارت المشروع عشان انافسك .. المشروع دا مريم هى اللى اختارته وهو المناسب لينا .. عشان كده متظلمنيش باى تفكير 
ادهم كلامها بيرن فى دماغه وفعلا هو من جواه مش زعلان انها ناجحه او ان شركتها بقت اعلى منه فى مجال معين .. هو مش مضايق من كده .. فى اللحظه دى حس بكلام اخوه امجد ويوسف .. حس پخنقه انه مخدش بايدها وساعدها وكافح معاها .. رجع بالذاكره لخمس سنين وافتكر لما خيرها بين انها تسافر معاه ولا انها تفضل .. اختارت شغلها .. تخيل للحظه لو كان خدها معاه وفضلت انسانه بلا هدف .. فضلت زى ماهى بهتانه زعلانه حاسه بالمعايره دايما مطفيه ! .. بصلها نظره طويله .. متخيلش انها هتنجح كده .. تخيل انها هتفضل فى المشغل وتاخد كورس وخلاص .. متخيلش ان طموحها وعزيمتها هيوصلوها للكيان اللى هو شخصيا تعب سنين عشان يبنيه .. متخيلش ان روحها قويه للدرجه دى ونفسها طويل وبتعافر رغم كل الظروف ! 
نيران حست برهبه من صمته .. هى خاېفه من رد فعله .. معقول ممكن يسيبها لمجرد انها نجحت وعملت كرير خاص بيها .. فى وسط افكارها تلاقى ادهم ابتسم وحط ايده على وشها وباصص فى عينها 
ادهم انا فخور بيكى .. وفخور انك اختارتى شغلك ومستقبلك عليا ووصلتى ونجحتى لوحدك .. انا عمرى ماهلومك ابدا 
نيران تحس بفرحه من جواها .. هو فعلا فخور بيها ومش مضايق .. 
نيران بدموع فرحه بجد مش هتسيبنى ! .. انت مبسوط باللى وصلتله صح 
ادهم باللى وصلتيله ولسه هتوصليله .. انا حابب اللى انتى فيه وحابب مجالك وياستى مش هسافر غير بعد عرض الازياء .. كنت جاى احضره اصلا لكن للاسف عملت الحاډثه و..
نيران تقاطعه وتبعد بسرعه وتبصله 
نيران انت كنت هتحضره ! .. كنت عارف انه ليا
ادهم ينزلها لا يانيران .. كنت رايح اشوف مين الشركه الخرافيه اللى قضت على قسم السواريه عندى واللى عملت نجاح كبير فى تلت سنين بس .. كنت رايح اشوف صاحبها المجهول .. 
يضحك.. مكنتش اعرف انى كنت لسه متخانق معاه قبل مااروح 
نيران كمان تضحك
وتبصله 
نيران انا فرحانه اوى انك مزعلتش 
ادهم ازعل عشان نجحتى واجتهدى وبقى ليكى كيان خاص بيكى .. بالعكس انا مبحبش الشخص اللى معندوش طموح وبيفضل ثابت فى حياته .. انا اټصدمت بس لكن دا ميمنعش انى فرحت 
نيران اممممم بس انت حبيتنى من قبل ما تعرف !
ادهم وانتى مش الشخص اللى احبه او اكرهه عشان الحاجات دى .. انا بحبك زى ماانتى ناجحه فاشله فانا عاوزك زى ماانتى 
نيران تبتسم وتفضل سانده عليه وادهم للحظه نسى كل اللى حواليه ونسى قرارته وشغله وكل حاجه .. مش بيفكر غير فى انها معاه وملكه برغبتها وارادتها مش مغصوبه .. واخيرا حبيبته بقت بين ايده وبقت هى اللى بتجرى عليه مش بتهرب منه .. حط ايده تحت دقنها ورفع وشها خلاها تبصله .. نيران تبصله بكل الحب اللى جواها .. بتبصله بنظره جديده قادره تهد كل حصونها اللى بناها من سنين .. ادهم بيبتسم وهى تبص للارض وتتكسف .. يرفع وشها ليه تانى 
ادهم بهمس بحبك 
نيران تبصله وقرت الكلمه فى عينه قبل ما تسمعها منه 
بعد مده طويله وادهم مش قادر يبعد عنها وكأن العالم انتهى بقربه منها .. وللاسف ابتدى يحس انه اتسرع لانه ملقاش اى رد فعل منها .. لسه هيبعد يتفاجئ بيها بتبتسم وغمضت عينها ادهم ابتسم والاتنين سكتوا تماما وخلوا لغه الحب